పోటీ ప్రపంచంలో బలంగా నిలబడటానికి తీవ్ర
పనిభారాన్ని మోయక తప్పని పరిస్థితి. కానీ.. ఇది తీవ్రమైన ఒత్తిడికి కారణమవుతోందని
నిపుణులు అంటున్నారు. సెల్‌ఫోన్లు, ఇంటర్‌నెట్‌, ల్యాప్‌టాప్‌లు
విస్తృతంగా అందుబాటులోకి రావటంతో ఆఫీసు నుంచి బయటపడినా.. ఆఫీసు ఒత్తిడి ఇంటికీ చేరుతోంది.
ఈ పరిణామాలు మరింత ఒత్తిడిని పెంచుతున్నాయి. 'మనుషులు
యంత్రాల్లా అదే పనిగా పని చేయలేరనీ, ఏదో ఒకచోట పూర్తిస్థాయిలో డస్సిపోతారని'
మాంచెస్టర్‌ యూనివర్సిటీ పరిశోధకులు స్పష్టం చేస్తున్నారు.
ఉద్యోగానికి సెలవు పెట్టటానికి 60 శాతం వరకూ ఒత్తిడి సంబంధ సమస్యలే
కారణమవుతున్నట్లు అధ్యయనాల్లో సైతం వెల్లడైంది. ఒత్తిడి తీవ్రత పెరుగుతున్న కొద్దీ
వ్యక్తిలో పని చేసే మానసిక సామర్థ్యం క్షీణించటమే కాకుండా, శారీరకంగా
ఆరోగ్యమూ దెబ్బ తింటుందంటున్నారు.
దీన్ని ఎదుర్కొనేందుకు..
- నివాస ప్రాంతం నిశ్శబ్దంగా, ప్రశాంతంగా ఉంటే మంచిది. ఇరుగు పొరుగు వారు సైతం అనుకూలంగా ఉండే వారుంటే మంచిది.
- విపరీతమైన ఒత్తిడి పెంచటంలో డబ్బుల పాత్ర కూడా అధికమే. వాటి గురించే ఎక్కువగా ఆలోచించటమూ, ఎలా ఖర్చవుతున్నాయనేది అస్సలు పట్టించుకోకపోవటం రెండూ సరైనవి కాదు.
- ఎంత పని ఒత్తిడి ఉన్నా, మధ్యాహ్న వేళల్లో 10-20 నిమిషాలపాటు చిన్నపాటి కునుకు తీయాలి. ఈ సమయంలో శరీరంలో జీవక్రియలు నెమ్మదిగా పని చేస్తుంటాయి. అంతేకాదు, మధ్యాహ్న వేళ నిద్ర జీవ గడియారానికి అనుగుణంగా ఉంటుంది. ఈ చిన్న కునుకు చాలా శక్తినిస్తుంది.
- మీ పిల్లలు మీలా అన్నింట్లో సంతృప్తికరంగా ఎదగటం లేదనే ఆత్మన్యూనత పెంచుకోవాల్సిన అవసరం లేదు. ఎంత మీ పిల్లలైనా వారి వ్యక్తిత్వం వేరుగా ఉంటుంది. ఇలాంటి విషయాల్లో మీలో పెరిగే ఒత్తిడి మిమ్మల్నే కాకుండా, మొత్తం కుటుంబంపైనా ప్రభావం చూపిస్తుంది.
- మీరు ఇతరత్రా ఆరోగ్యంగా ఉన్నా సరే.. క్రమం తప్పకుండా అన్నిరకాల వైద్య పరీక్షలూ చేయించుకుంటుండాలి.
- సమయం వృథా కాకుండా మరింత చక్కగా ఉపయోగించుకోవాలి. రోజువారీ ప్రణాళిక, ఏ సమయంలో ఏయే పనులు చేయాలి వంటివన్నీ ముందుంచుకుని, వాటి ప్రకారం పని చేయటం వల్ల గందరగోళం తగ్గి, పనులన్నీ అనుకున్న సమయానికి పూర్తవుతాయి. దీనివల్ల చాలా ఒత్తిడి తగ్గుతుంది.
- సామాజిక అనుబంధాలు కేవలం మానసికోల్లాసం కోసమే కాకుండా, మానసిక ఆరోగ్యానికీ తోడ్పడతాయి. మీలో అంతర్గత ఇంధన వనరులు తగ్గిపోయినప్పుడు స్నేహితులతో గడిపే సమయంతో శక్తిని పుంజుకోవచ్చు.
- మానసిక ఒత్తిడి తగ్గించుకోవటానికి ఏదైనా కొత్త హాబీని అలవాటు చేసుకోవాలి. దీనితోపాటు పెంపుడు జంతువుల సంరక్షణ కూడా ఒత్తిడి తగ్గించటంలో బాగా పని చేస్తుంది. పెంపుడు జంతువులతో మసలేవారి ఆయుర్దాయం ఎక్కువగా ఉంటున్నట్లు అధ్యయనాల్లో వెల్లడైంది.
- కొన్ని విషయాల్లో మన దృక్పథంలో సైతం మార్పురావాలి. దీనివల్ల ఒత్తిడి చాలామేర తగ్గుతుంది. ఆఫీసుకు వెళ్లే సమయంలో రిలాక్సేషన్‌ పొందేలా అలవాటు చేసుకోవాలి. బస్సు, రైలు వంటి వాటిలో సైతం ధ్యానం చేసుకోగలిగే అలవాటు పెంపొందించుకోవాలి.
- రోజువారీ పనుల నుంచి బయటపడి కొద్దిసేపైనా ధ్యానం చేసేవారిలో ఒత్తిడి ప్రభావం తక్కువగా ఉంటున్నట్లు పలు అధ్యయనాల్లో గుర్తించారు.
